2Ch 17 | NdeIBE | STEP | UJehoshafathi indodana ka-Asa waba yinkosi esikhundleni sakhe; wazilungisela ukumelana lo-Israyeli empini.

2 Chronicles 17

UJehoshafathi iNkosi YakoJuda

1 UJehoshafathi indodana ka-Asa waba yinkosi esikhundleni sakhe; wazilungisela ukumelana lo-Israyeli empini. 2 Wabeka amabutho emizini ebiyelweyo yakoJuda wafaka amaviyo koJuda kanye lasemizini yako-Efrayimi eyayithunjwe nguyise u-Asa.

3 UJehova wayelaye uJehoshafathi ngoba ngeminyaka yakuqala wayehamba ngezindlela ezalandelwa nguyise uDavida. Kabadinganga oBhali, 4 kodwa wadinga uNkulunkulu kayise njalo walalela imilayo yakhe kazange alingisele okwakusenziwa ngabako-Israyeli. 5 UJehova wawuqinisa umbuso wakhe, bonke abakoJuda baletha izipho kuJehoshafathi, ngakho wanotha kakhulu njalo wahlonitshwa kakhulu. 6 Inhliziyo yakhe yayikuJehova ngokuzinikela okukhulu ezindleleni zakhe; njalo wasusa zonke izindawo zokukhonzela wadiliza lezinsika zikankulunkulukazi u-Ashera koJuda.

7 Ngomnyaka wesithathu wokubusa kwakhe wathuma izikhulu zakhe oBheni-Hayili, lo-Obhadiya, loZekhariya, loNethaneli kanye loMikhaya ukuba ziyefundisa emizini yakoJuda.

8 Ndawonye lazo kwakulabanye abaLevi uShemayiya loNethaniya, loZebhadiya, lo-Asaheli, loShemiramothi, loJehonathani, lo-Adonija, loThobhija kanye loThobhi-Adonija – labaphristi o-Elishama loJehoramu. 9 Bafundisa kulo lonke elakoJuda, bethwele uGwalo lweMithetho kaJehova; babhoda yonke imizi yakoJuda befundisa abantu.

10 Ukumesaba uJehova kwagcwala kuyo yonke imibuso yamazwe akhelane loJuda, ngakho abalwanga loJehoshafathi. 11 Amanye amaFilisti alethela uJehoshafathi izipho lesiliva njengomthelo, lama-Arabhu aletha imihlambi yezimvu: izinkulungwane eziyisikhombisa lamakhulu ayisikhombisa ezinqama, lezimbuzi eziyizinkulungwane eziyisikhombisa lamakhulu ayisikhombisa. 12 UJehoshafathi waba lamandla amakhulu angezelelweyo, wakha izinqaba lamadolobho eziphala koJuda 13 njalo wayelokudla okunengi emizini yakoJuda. Wayelamabutho akwaziyo ukulwa ayehlala eJerusalema. 14 Wona ayemi kanje ngezimuli: KwabakoJuda, abalawuli bamaviyo enkulungwane; u-Adina umlawuli, elamadoda okulwa impi ayizi-30,000;

15 kulandele uJehohanani umlawuli, elezi-280,000;

16 kulandele u-Amasiya indodana kaZikhiri, owazinikela ukusebenzela uJehova elamadoda ayizi-200,000.

17 KwabakoBhenjamini: kungu-Eliyada, elibutho elilesibindi, elezi-200,000 zamadoda ayehlome ngamadandili lezihlangu;

18 kulandele uJehoshafathi elamadoda ayizi-180,000 ayehlomele ukulwa impi.

19 Yiwola amadoda ayesebenzela inkosi, ngaphandle kwalawo ayesemzini ebiyelweyo kulo lonke elakoJuda.